Мунаввара Юсуф

Отрывок из сборника стихотворений

ТАБИАТ МЕН СЕНИНГ….

Табиат мен сенинг бўлагинг…
“Ҳа!” десалар, “-ма”… ни билмаган
Курашларда толди юрагим,
Исёнлардан четда туғилган…

Ҳурматнинг ҳам чегараси бор,
Андиша отмасин инсонни…
Оталиққа олгин сен Баҳор,
Гулбарг узра шабнамдай жонни…

НАЗАРИМДА…

Назаримда вужудларда суяклар эмас.
Бардам умид тиклаб борар одам қаддини
Тилак бўлиб, ният бўлиб олинган нафас
Уфқларга ёзгим келар инсон дардини…

КЎЗЛАРИНГИЗ

Кўзларингиз зиёсига кўмилмоқ учун
Киприк оёқ, бир жонимни мингга бўламан
Ўтлар билан ошно… Сизни деб беун…
… Яшашимни билсангиз гар, бахтга тўламан!…

УҚУВСИЗЛИК

Уқувсизлик қилган қалбимни
Изтироблар сўйиб ташлади
Яхшиликнинг ўлмас ҳаққини
Ҳалолликнинг кўзин ёшлади…

Боролмади у метин издан
У латта виждонни қилсин бут!
… Ҳимоясиз, ҳар чақноқ кўздан,
Раҳм қил, сен унга она-юрт!

НИМА ҲАМ ТИЛАРДИМ…

Нима ҳам тилардим, келажак кундан
Оилам – фарзандлар тинчлиги бўлса
Оила, фарзандлар берган илоҳнинг
Менга берган дами – ўзи-ла тўлса…

Нима ҳам тўлдирди қўлнинг кафтини?!
Куннинг унларига қулоқ тутаман.
Ҳеч ким ололмайди, ичнинг тафтини,
Онамнинг меҳрини мангу кутаман

Тақдирнинг олдида чопиш йўқ энди,
Олов ҳам қочмоқда мендан нарига.
Музликлар эриди, шамоллар тинди,
Дил имкон топарми, мунис эртага?!

Сирлар тўла сандиқ, ғайбнинг олами,
Карами кенг оллоҳ калитин берса…
Хаёлнинг энг ўткир, илоҳий дами,
— Эзгулик боғидан гулдаста терса…

Нима ҳам тилардим, келажак кундан
ЭНГ НАФИС ВА РОСТ СЎЗ бўла олмас жим
Қалбдаги илоҳий, оғриқли ундан
Вазият вақтида тополсин ечим….

МУНИСГИНАМ

Мунисгинам, она ҳаёт йўлларингни бер,
Этакларинг манглайимга тўтиё қилай.
Кўзларингни кўрай ахир, улар нима дер?!
Оппоқ, нурли сочларингни биргина силай…

Тўққиз юз минг темир эшик хизматда бўлган,
Ғайбий етти девор ичи бўлса маконим,
Забт этишнинг илинжида кимдир югурган,
Ва кимлардир ишқ ўтида бўлса сомоним …

Мукаррамам, она ҳаёт йўлларингни бер,
Сендан ўтиб кетақолса, майли мен рози.
Кўзларингни кўрай ахир, улар нима дер,
Мен ўзимни сенга қўйдим … одил тарози …

ҚИРРАЛАР

Ташқи таьсир кучидан салбий,
Меьёри бузилар вужудни
Бардошига суянар … Олий,
минг бўлакка бўлинган бутми?!

Жаннат нурин истаган дилга
Дўзах ўти келдими, ёраб ?..
Бу бир синов … яна кўнгилда …
Чарчамасман … уфққа қараб…

Шохига қўнганим гул эмасмиди?
Тангридан бир қатим нур эмасмиди?!
Измида юраркан бу холис ишонч,
Замона зайлидан кўр эмасмиди?!
Ўтган давр жимгина ўтиб кетдими?
Исёни, ноласи кўкка етдими?

Мен энди кетаман Оллоҳга
Макон тутса… кимнинг қалбини
Топинамиз ёлғиз илоҳга
Оқартиш – чун шарқу ғарбимиз
Бир буюк саволман, дунёларга кўз
Борми сан эй раббим, ЭЙ ИЛОҲИЙ СЎЗ ?!

БИР МАЛАК – ЕЙ . . .

Бир малак – ей ҳаволарга ёяр бўйин.
Арғумоғи олиб қочса нима қилсин?
Эркалигим кўтарар деб ишқнинг кўйи,
Тилинган бу юрагини асрар бетин.

Эркалигин кўтармади ишқнинг йўли,
Ниналардек тиконлари ёмон ботди.
30 минг йил қасрингизга кира олмай,
Қалбидаги ишқ-арслони бежон ётди.

Юзминг пора бўлган ночор жигарини,
Қай тўқайда бўриларга ем қилмагин.
Имкон кетган ҳолидаги… агарини,
Ўзинг хал қил, ўзгаларга тенгламагин.

Қасрингизга кира олсин қизил гулдай.
Хушбўйлари тута олсин шу оламни.
Ачинишлар сабаб бўлган бемор тулдай,
ЕТИМ ҚИЛМА, АХИР РАББИМ ШУ ҚАЛАМНИ…

ИЛТИЖО

Мени қизим дегин, онажон юртим
Қизим дегин мени, хокисор тупроқ
Маьсум мусичадай бағрингда ўсдим,
Тоғдайин бир дардни кўтариб бироқ…

Тинчлик менинг ҳамон болалик орзум,
Хотиржамлик – ҳаракатда баракат
Шу икки нарсани кўзлайди кўзим,
Тасодиф ариларга чўқтирма қисмат…

Ақлимни шоширар илон ўйини,
Йўлбарс ҳамласидан қўрқаман аҳир..
Кўрсатма куённинг мағлуб кўйини,
Ўзин кўрсатаолар ирода ҳақир…

Руҳинг … бу тошларга кўниккан руҳинг,
Игнадек озордан ер билан тақир.
Сенинг меҳринг – дилнинг шукуҳи
Тарк этмасин бизни ўртадаги Сир…

Мени қизим дегин…

Кундалик

Юрагим орқага тортган кунданоқ,
Шеърнинг кўчасидан ўтмадим АЗИЗ,
Гоҳ арслон бўлибман, гоҳида тупроқ,
Буюк қўрқувлардан титраган, унсиз…

Мени тарк этдими шеърият сеҳри,
Ёки барчасидан мен совиб қолдим…
Умид ва орзуларим кўмилган -қабрин —
Лаҳзалардан топиб, воажаб толдим…

Севгимга бежавоб ўтар лаҳзалар,
Қай бир, қай бир ишни хато қилдим мен…
Сабримни синайди «қилич» — ларзалар,
Ўзимни ўзимдан жудо қилдим мен…

Сарғайган баргларим заминни тўшар,
Шамол ҳам ҳар ёнга ўйнар учириб,
Йўқ, бу мен эмас, дейману, шу чоқ:
Давр-давроним ҳам келади қучиб…

Ассалом, қувончнинг маликалари,
Шунчалар…Мен сизга муштоқ бўлдим, оҳ.
Ортда энди… ҳаёт таҳликалари…
Қадр ва қийматни бергувчи Аллоҳ…

ОЁҒИМ КЎМГАН ТУПРОҚ

Оёғим кўмган тупроқ —
Она юрт, беназирим,
Хаёлдан кетмас бироқ
Орзудаги тақдирим …
Мунаввар тонг бошимга
Нурларинг гулчамбар қил,
Эгизмиз-ку қошингда
Мен, яна мунаввар дил.
Унда яшайди майса –
Ўзбекистон баҳори,
Дил туғёнинг камайса
Муҳаббатдир оҳори.
Унда яшайди малак
Кўкларнинг фариштаси,
Бўлаверсин жон-ҳалак,
Ишқ-дилнинг сариштаси.
Унда яшайди орзу,
Ўзин топмаган имкон,
Бўл, ахир тош-тарозу,
Шу қизингга, онажон …

МАЪНАВИЯТ ҚАЛБНИНГ ҚУЁШИ

Маьнавият-қалбнинг қуёши
Нурлантирар умр йўлларин
Эзгулик – у, соғинч йўлдоши
Меҳр бўлар узун қўллари …

Ҳайратида қушлар парвози
Осмонларда ибодат қилар
Мезонларнинг қилич овози —
Муҳаббатдан яна не тилар?!…

НАЗАРИНГДАН ҚОЛДИРМА

Қалб сўзлари битилган китоб
Бўлолмаса қалбимга паноҳ.
Малҳамингга зорман ушбу тоб,
Назарингдан қолдирма оллоҳ.

Эпкинларнинг даврий имкони
Совутади юрак тафтингни
Малҳамнинг, рағбатнинг султони
На тўлдирди қўлнинг кафтини

Назарингдан қолдирма оллоҳ
Нафасларнинг муҳаббатига
Ошно қилгин, сирни қил огоҳ
Икки дунё саодатига…

УЙИ ЙЎҚДИР ҚАЛАМНИНГ

Уйи йўқдир қаламнинг
Макони, ҳудуди йўқ.
Бағрини елга очар,
Дардларидан рангги тўқ

Уйи йўқдир қаламнинг
Борар ери, жойи йўқ.
Олиб билган қалъасин
Тунларининг ойи йўқ

Нима қилсин, не қилсин
Тўкиб солар ҳоврини:
— Уйли бўлиб туғилсин,
Кетмас бўлсин оғриниб!…

БАС ҚИЛИНГ …

Бас қилинг овозлар …
жаранглар,
Йўқолинг ҳар қандай бўш ранглар.
Бу ерда мен темир тирноқ
асаблар чангалидан,
Тартибли юмушлар жадвалидан.
… Англамоқчи ва қутқармоқчи
бўлганим ўзим
ва яна,
Кишилик оламига деразадан қараб қочгандек
тетапоя қадами-ла.
Туртиниб-суртиниб
келаётган болакай.
Мен ахир, қўрқаман …
ҳали ёвузлар,
тиши йўқ ялмоғизлар
Шу мўъжаз инсонни пайҳон қилгудай,
Боғларни, тоғларни —
бус-бутун жаҳонни
пайҳон қилгудай
Қора девлар яшар …
яшар,
Ҳар олган нафас
шундай бўғиб киради ичга,
Ва чиққани, тинчлик муқаддас —
— Интилгани, ёруғ бир кучда …

ЁЛҒИЗ ОЛЛОҲ БИЛАН

Ёлғиз Оллоҳ билан
ёлғиз қолган кун …
Майсалар унади
юракларимда…
Етти қат осмоннинг
юлдузларини
Гул қилиб қўйсам-а
этакларимга….
Ёлғиз Оллоҳ билан
ёлғиз қолган кун

Тилсимот дунёси
юз очса дейман,
Бармоқлар тилини
тушунса башар.
Билмадим, мен кимнинг
ғамини ейман,
Орзумда, негадир,
бир ўзи яшар…
Ёлғиз Оллоҳ билан
ёлғиз қолган кун…

Дўстлар-ку, келмади,
дўстнинг вақти йўқ.
Бағримга санчилар
аллақандай ўқ.
Шукур, ўқлар билан
ярим кўнглим тўқ.
Ёлғиз Оллоҳ билан
ёлғиз қолган кун…